hadraawi muxuu yidh:

Wacdaraha Adduunka

Walaac anigoo ku seexday
maxaan walbahaar la toosay
wareer anigoo la liita
maxaan werwer jiifi waayey.
Maxaan sida weer cadhaysan
saqaa dhexe gaaf-wareegey,
intuu waqal ii hillaacay
maxaan kula rooray weelka,
u baydhay wadiiqo leexsan
wakhtigu i tilmaami waayey.
Jacaylku muxuu i wiiqay
muxuu wadnahayga shiilay
Maxaan shimbiraa waraystay
u dhiibay waraaq daboolan
haaddii wacdigayga qaadday
cid weeye tidhaahda weydey.
Waayeel dadow
inan waalanahay
duni weer siddoo
weligeed dhintoo
wacadkiyo xadhkii
weydaarataan
weetaynayaa.
Wadeeco maxaan ilaashey
waraabe ka soo xereeyey
sac weyda maxaan u dhaanshey
Walwaal ugu soo arooray,
halkiisa ku soo waraabshey.
Maxaan weli soo kexeeyey
wadaaddo maxaan u yeedhay
u loogey wankayga fiican.
Waxyeello halkay u taallo
naftayda maxaan ka waanshey,
walaalkay nimaan u haystey
muxuu waddo ii fadhiistay.
Qof aan wehelkayga moodey
ka qayb galay weerarkayga
ruuxaan la wadaagey oontu
ku wiirsadey dhiilladayda.
Waayeel dadow
inan waalanahay
duni weer siddoo
weligeed dhintoo
wacadkiyo xadhkii
wrydaarataan
weetaynayaa.
Maxaan wacdaraa adduunka
u soo jirey waayaheeda
warkeeda la ii dhammeeyey
maxaa waran layla doonay
habeennimo layla waayey
nasiib kaga waa bariistey,
maxaa dabin lay wareejay
wedkeyga la ii shir-qoolay,
maxaan dacar lay walaaqay
waabeeyo ku caafimaaday,
Maxaan wacad layla qaatay
rumaystay Wallaahi beena.
Maxaan webiyaal is-jiidhay
dhexdooda ka waab-samaystay
wanaag anigoo sameeyey
maxay wadhi ii dambeysey.
Wayeel dadow
inan waalanahay
duni weer sidoo
weligeed dhintoo
wacadkii xadhkiyo
weydaarataan
weetaynayaa.